Liebi Froue u Manne, Meitschi u Buebe vo dr Chiuchgmein Schwarzenegg
Itz isch es auso Zyt, zum Adie säge. E erfüllti, schöni, längi Zyt aus Pfarrer y üsere Chiuchgmein geit em Ändi zue. U dankbar luegen ig zrugg uf die Zyt, wo am 6. Mai 2001 mit em Installationsgottesdienscht agfange het. (ig ha dr Zyttigspricht vo denn no uf d Syte tah u itz ungernache ygfüegt)
I bi dankbar für all die Hiuf u Ungerschtützig, won ig dür die viele Froue u Manne im Chiuchgmenrat ha dörfe erfahre. Und i gloube, i darf das a dere Schteu scho betone: mir hei y all dere Zyt eigentlech nie es grosses Gschtürm oder schwiregi Usenangersetzige gha. Merci öich aune zäme! Es wähjt e guete Geischt y dere Chiuchgmein.
I bi o dankbar für die gueti Zämenarbeit mit de Sigristinne, Katechetinne, KUW-Mitarbeiterinnen u natürlech o für aui freiwillige Hälferinne u Hälfer, wo über all die Jahr geng hei ghulfe das Chiuche-Schiff über Wasser bhaute u vorwärts trybe.
Dankbar bin ig o für all die Begägnige u Gspräch mit Toufeltere, Hochzytspäärli, Truurfamilie u all dene Mönsche, wo mir ihrer Sorge avertrout hei. Merci heit dir mi a wichtige Momänte y öjem Läbe lah teilha, von der Wiege bis zur Bahre.
U was für mi o gäng ume wunderschöni Momänte sy gsy, won i hüt o wott Danke säge derfür, sy all die Begägnige mit dene Hunderte vo KUW-Ching. Dörfe beobachte u miterläbe, wie sech Ching langsam zu Erwachsene entwickle, u speter säuber Eutere wärde u ume ihrer Ching y ds KUW schicke, het mir viu zrugg gäh – u ja, o echli mit Stolz erfüut.
Dankbar bin ig aber o für au das, won ig ha dörfe erläbe u niemer us dr Gmein öppis derfür cha: es sy aui die Füegige, die „Zuefäu“, aui die Türli, wo unverhofft gäng ume u wie vo säuber für mi si ufgange. Mir isch y dere schwarzenegger Pfarramtszyt eso viu gschänkt worde, dass ig eifach o no em Liebgott a dere Schteu möcht Danke säge.
U mit all dene schöne Erinnerige sägen ig dr ganze Chiuchgmein Adieu – im Gloube dra, dass dir aui zäme wyterhin y Gottes Häng geborge syd: Á-Dieu
u bhüet nech Gott Thomas Burri